ANAY KATAPO SANG COMMUNIST TERRORIST GROUP NGA WANTED SA KASO NGA MURDER KAG REBELLION, NADAKPAN SA BANWA SANG DUMALAG!

19
Dumalag, Capiz – Arestado sa Barangay Santa Carmen, Dumalag, Capiz ang anay katapo sang Communist Terrorist Group (CTG) nga wanted sa kaso nga murder kag rebellion, alas 12:59 sang hapon.
Ginkilala ang akusado kay Michelle Penequito alias “Inday”, 33-anyos kag tumandok sang banwa sang Dumalag.
Ang warrant of arrest sini sa kaso nga murder ang pirmado ni Honorable Daniel Antonio Gerardo S. Amular, Presiding Judge sang Regional Trial Court, 6th Judicial Region, Branch 21 sa banwa sang Mambusao.
Ini ang ginpetsahan Hulyo 16, 2012 sa diin wala sang piyansa para sa temporaryo sini nga kahilwayan.
Samtang ang warrant of arrest naman para sa kaso nga rebellion ang napetsahan Hunyo 28, 2012 nga may piyansa nga P40, 000.
Suno sa report, si Penequito ang anay membro sang Igabon Platoon sa idalom sang Komiteng Rehiyon Panay (KR-P) kag ginapatihan kaupod ini sa mga rebelde nga nag-ambush sa tropa sang militar sang Agosto 28, 2011 sa Barangay Switch, Tapaz, Capiz.
Nadakpan ang amo nga persona sa bulig sang ginhugpong nga pwersa sang Mambusao Municipal Police Station, 2nd Capiz Provincial Mobile Force Company, 3rd Platoon, Capiz Mobile Force Company, Regional Intelligence Unit 6 kag Dumalag Municipal Police Station nga amo ang nagserbe sang warrant of arrest para sa kaso nga Rebellion samtang si Police Senior Master Sergeant Mark Llorente sang Mambusao MPS amo naman ang nag-implementar sang warrant of arrest para sa kaso nga Murder.
Facebook Comments