AWAY SA DUTA, MOTIBO SA PAGLUTHANG SA ISA KA LALAKI SA BANWA SANG PILAR!

Pilar, Capiz – Ang madugay na nga away sang magpamilya sa duta ang ginatudlo kabangdanan sa pagkaluthang sa biktima nga si Emmanuel Matillano y Bermejo, 27-anyos ang pang-edaron sang Barangay San Esteban, Pilar, Capiz.
Samtang ang suspek ang ginkilala kay alias Edoy Bacanto, residente man sang nasambitan nga lugar kag nagapadayon nga atlarge.
Suno sa imbestigasyon sang kapulisan, nagpadulong malapit sa panimalay sang suspek ang biktima agud kompruntahon kun ngaa ginsarado ang access road nga gina-awayan sang magpamilya.
Diri hinali lamang nga naggabot sang wala mapahayag nga sahe sang pusil ang suspek kag ginluthang ang biktima nga nag-angkon sang pilas sa tiyan kag iban nga parte sang lawas.
Madasig nga nagpalagyo ang suspek samtang una nga ginpadangat sa Bailan District Hospital ang biktima apang ginpakamaayo nga i-refer ini sa isa ka ospital sa Iloilo.
Yara na subong sa istabli nga kondisyon ang biktima apang padayon nga gin-obserbahan sa intensive care unit (ICU) sang ospital.
Facebook Comments