Nasapwan nga wala na sang kabuhi ang isa ka babayi nga may deperensya sa paminsaron sa likod sang barangay hall sang Bagacay, San Rafael, Iloilo alas 8:45 kaina sang aga.
Ginkilala ang biktima kay alyas Frelyn, 26 anyos kag residente sang Brgy. Poblacion , San Rafael.
Suno kay Police Senior Inspector Kenn Albert Lepsia sang San Rafael MPS, may pilas sa idalom sang tuo nga ilok ang biktima.
Nagisi man ang panit sa ulo sang biktima kag nagagwa ang iya bagol nga ginapatihan tuga sang labo.
Santo sa inisyal nga imbestigasyon, fiesta sa Brgy. Aripdip, kahapon, 7 ka kilometro ang kalayuon halin sa crime scene kag nakit-an pa ang biktima kagab-i nga nagalagaw sa lugar.
Suno naman sa pila ka mga residente sa Barangay Bagacay, may duha ka motorsiklo nga nagpadulong sa lugar alas 3:00 kaina sang kaagahon apang indi pa makumpirmar kon nakasakay diri ang biktima.
Sa karon, nagapadayon pa ang imbestigasyon sang kapulisan.
Bantayan ang dugang nga detalye.
#TatakRMN
