Margosatubig, Zamboanga del Sur – Nahunusan sa hinulamang kinabuhi ang usa ka babaye nga stenographer sa Purok Orchids, Barangay Poblacion, Margosatubig, Zamboanga del Sur, sayo sa kabuntagon adlaw nga sabado.
Sumala pa sa PNP Margosatubig naila ang biktima nga si Josephine Montano Butig, 59 anyos, ug residente sa naasoy nga dapit.
Sumala sa imbestigasyon sa otoridad, nga samtang nagbantay ang anak sa biktima nga si Angelica sa ilang tindahan, dunay miduol nga usa ka lalaki ug nagpasumangil nga mopalit og sigarilyo apan kalit kining misulod diretso sa ilang tindahan og sa walay igong hinungdan gipusil sa makadaghan ang iyang inahan samtang nagluto sa sulod.
Narekuber ang duha ka basyo sa mga bala sa kalibre 45 sa dapit hitabuan. Pagkahuman sa pagpamusil niikyas ngadto sa wala pa matino nga dereksyon ang suspek.
Nahiagom ug ubay-ubay nga igo pinusilan ang biktima sa nagkada-iya nga parte sa iyang kalawasan.
Gisulayan pa pagdala sa balay tambalanan ang biktima apan pipila ka mga oras namatay ra gihapon kini.
Sigon sa mga kapulisan ang suspek ang nagsuot og itom nga pantalon, kolor abo nga jacket nga dunay hood ug nag-face mask. Niining panahaona padayon pa nga gisusi ang motibo sa maong krimen.
