Balor usa ka milyong drogang shabu, nakompiska sa mga kapulisan

Gibana-banang mukabat sa kapin usa ka milyon ka pesos ang kantidad sa drogang shabu nga mitimbang og 156 gramos nga nakompiska sa mga kapulisan atol sa drug buy-bust operation nga gipahigayon takna alas 7 sa kagabin-on adtong milabayng Lunes didto sa Purok-8, Barangay Poblacion, Valencia City, Bukidnon.

Lakip nga nakompiska ang usa ka P1000 Bill, usa ka belt bag kolor itom, 16 ka tag usa ka libo nga pekeng kwarta ug usa ka lighter. Nadakpan usab atol sa operasyon ang duha ka lalaki nga suspetsado sa pagpayuhot sa illegal nga droga nga silang Jonathan Ian Agdon, 25 anyos, ulitawo ug residente sa Purok-5, Patag, Barangay Bagontaas, Valencia City ug si Raul Loregas, 37 anyos, ulitawo nga residente sa Purok-1, Barangay Laligan, Valencia City, Bukidnon.

Gidala na sa Valencia City Police Station ang mga nakompiskang droga lakip ang mga nadakpang suspetsado alang sa tokmang disposasyon samtang ipagturn-over sa PNP Provincial Forensic Unit, Malaybalay City ang drogang nakompiska alang sa eksiminasyon.

Mag-atubang sa paglapas sa RA 9165 kon Comprehensive Dangerous Drugs Act of 2002 ang mga dinakpang suspetsado.