Bangud sang pagnote down lang sang iya sulat, konseho sapulon ni Espinosa

ILOILO City – Luyag nga sapulon ni Mayor Jose Espinosa III ang konseho matapos gin-note down lamang sang mga konsehal ang iya sulat nga nagahingyo nga imbestigaran ang P12.349 billion nga joint venture agreement sang Metro Iloilo Water District (MIWD) kag MetroPac Water Investments Corporation (MWIC).

Suno kay Espinosa nakabaton sya sang impormasyon nga gin-note down lang ang iya request.

Martes sa session sang konseho gin-note down lamang nila ang sulat sang alkalde nga nagahingyo sang imbestigasyon.


Ginsiling sang konseho nga wala sa ila poder ang mag imbestigar sa ginsudlan nga kontrata sang MIWD sa Metro Pac.

Nagakahangawa man ang konseho nga posible sila makasuhan lakip na ang alkalde kun dayunon nila ang imbestigasyon.

Ginpahayag ni City Councilor RLeone Gerochi, Chairman sang Committee on Public Utilities sang konseho nga mas gusto nila sunod ang pamaagi sang paghinambalanay agud maathagan ang isyu.

Ginsiling ni Espinosa nga luyag gid niya nga masanagan sa kaundan sang JV ilabi na sa isyu sang saka sa water rate.

Samtang ginpanindugan ni Espinosa nga paglapas sa protocol ang imbitasyon sa iya nga magtambong sa presentation sang MetroPac kag MIWD sa konseho.

Nahibaluan nga gin-imbitar man si Espinosa sa presentation sang konseho apang wala sya nagtambong kag wala man nagpadala sang tiglawas.

Panindugan ni Espinosa kun luyag mag-estorya sang MIWD sa mayor, magsulat ka kag sa alkalde una.

Facebook Comments