Naniniwala si dating Supreme Court Associate Justice Antonio Carpio na bababa pa mula sa 16 ang kinakailangang boto para ma-impeach si Vice President Sara Duterte.
Sa harap ito ng inaasahang pagsisimula ng impeachment trial ng Senate Impeachment Court laban kay Duterte sa susunod na buwan.
Sa Kapihan sa Manila Hotel, sinabi ni Carpio na ito ay dahil kasalukuyang nakakulong si Senator Jinggoy Estrada at pinatawan din ng suspensiyon ng Sandiganbayan.
Sa kaso naman ni Senator Bato Dela Rosa, hindi pa rin daw siya maaaring isantabi sa botohan lalo’t hindi pa naman naaaresto.
Pero posible pa rin aniyang bumaba ang threshold para ma-convict si VP Sara kung may iba pang senador na makukulong dahil sa katiwalian.
Samantala, sinabi ni Carpio na posibleng tumagal ang proseso sa impeachment sakaling katigan ng Senate Impeachment Court ang motion to dismiss ng kampo ni VP Sara dahil inaasahang dadalhin naman ito ng prosekusyon sa Korte Suprema.
