Davao City – Nadisgrasya ang usa ka bus human nakasugat og baka sa dalang National Highway sa Sitio Bagsak, Brgy.Lacaron, Malita Davao Occidental hinungdan nga nakaangkon og mga minor injuries ang mga pasahero sa ACF Bus Line Yutong Bus Truck Bus Model 2017.
Subay sa blotter sa Malita PNP, nahitabo ang aksidente alas 7:30 sa buntag kagahapon diin ang maong bus gidrayban sa usa ka Ariel Quimpo, 57 anyos, nagpuyo sa Brgy. Kibalatong, Malita, Davao Occidental.
Sa imbestigasyon sa Malita PNP nga samtang nagdagan ang maong bus ug pag-abot sa nasangpit nga lugar, kalit nilabang ang baka nga maoy hinungdan nga nabangaan sa ug natumba ang baka.
Hinuon walay mga nagrabehan ug wala usab kinabuhing nakalas gawas sa mga minor injuries nga naangkon sa mga pasahero.
Sa dugang imbestigasyon, damyos ang atubangan sa bus ug ginasuta pa karon sa kapulisan kung kinsa ang tag iya sa maong baka.
Nagpahimangno ang kapulisan sa Malita ngadto sa mga nagpuyo daplin sa dalan nga hiktan ang ilang kahayopan aron malikayan ang disgrasya sa mga sakyanan nga muagi sa maong lugar.Sa datus sa Malita PNP, anaa na sa upat ka vehicular accident ang natala sa ilang buhatan karong semanaha diin sagad hinungdan mao ang mga hayop nga mukalit og tabok sa kalsada.
RadyoMaN Don Pulayao
