Civilian mi-drive sa TF Davao truck nga nakabangga, 2 patay 3 angol kasohan

Davao City – Gikustodiya na sa San Pedro Police Station ang civilian nga si Crenenandy Cadiente, 44 anyos, taga Purok 12, St. John, Bucana, Brgy.76-A, Davao City nga maoy misulod og mi-drive sa truck sa Task Force Davao nga nibangga sa motorsiklo, sakyanan ug duha ang gideklarang dead on the spot ug pagkangol sa lain pang tulo ka individual, nahitabo niadtong Domingo alas 5:30 sa buntag, Disyembre 24, 2023 sa Pitchon St.,Bankerohan Public Market.

Sa interview sa DXDC RMN Davao kang Police Major Marvin Hugos, Hepe San Pedro Police Station gibutyag niini, karong adlawa December 27 ipasaka sa korte ang kasong reckless imprudence resulting to homicide in physical injuries and damages to property batok kang Cadiente. Segun ni Hugos, subay sa inbestigasyon ang maong civilian kanhi pasyente sa Davao Mintal Hospital ug posibleng adunay deperensya sa pangisip.

Ang duha nga namatay mao sila Jamie Cole, 63 anyos, taga Km.10, Cabantian, Buhangin, Davao City ug Rocel Luna Haspe, 34 anyos, taga Purok 15, Green St., Spring Village, Brgy.Maa, Davao City. Samtang ang tulo ka angol padayong gitambalan sa Southern Philippines Medical Center (SPMC) nga sila Teresita Tangaro, 45 anyos, Michael Maghuyop, 44 anyos ug Mae Antoneth Anticamara, 20 anyos.

“Masmaayo siguro nga mag-amping sa kanunay kay ang usa ka insidente sigundo lang gyod unya mokalas sa kinabuhi sa kanunay mag-matngon, dapat advance maghuna-huna para malikayan ang parihong ing-ani panghitabo”, sulti ni Hugos.

Kahinumduman, giparking sa driver sa truck sa Task Force Davao kay mikanaug samtang nag-andar sa dihang gisakyan ug gimaniho ni Cadiente, hinungdang gibanggaan ang mga biktima ug mga sakyanan.

RadyoMaN Don Pulayao