DCPO giimbestigahan kung parte sa sindikato ang nang-hold up sa J&T

Davao City- Gimanduan ni Davao City Police Office City Director Alberto Lupaz ang station commanders nga mutabang sa pagsolbad sa robbery incidents ilawom sa Talomo Police Station.

Gibutyag ni Police Captain Hazel Tuazon, Spokesperson sa DCPO adunay duha ka person of interests ang ginasubay karon sa mga awtoridad nga nanghold-up sa delivery service company sa Catalunan Grande, Davao City kagahapong adlawa, Setyembre 11, 2023.

Gisubay na usab sa mga kapulisan ang mga cctv footages sa pagidentipika sa mga suspek kinsa kalit lamang nisulod sa establisyemento ug nagdeklara og hold-up bandang alas 9:45 sa buntag.

Matud ni Tuazon mga armado ang suspek ug human makuha ang mga kwarta dali kining nisibat sakay og motorsiklo.

Lakip sa gilantaw nga anggulo kung parte sa organisadong mga sindikato ug kung konektado ang pagpanulis nga nahitabo sa grocery store sa Puan diin at large pa usab ang mga suspetsado sa krimen, segun ni Tuazon.

RadyoMaN Aimee Guinita