DILG gihupay ang kabalaka sa mga ‘unvaxxed people’ human ipakuha ang pangalan sa barangay

43
Gihupay sa Department of the Interior and Local Government (DILG) ang kabalaka sa publiko human niniing gimando sa mga barangay nga kuhaon ang mga pangalan sa mga bakunado ug dili pa bakunadong indibidwal.

Pasabot sa buhatan nga usa sa mga hinungdan maong kuhaon ang datos sa mga dili pa bakunado aron masayran kung unsa pa kadaghang bakuna ang igahin sa gobyerno.

Gipasabot pa niini nga tumong usab niining masuta ang tawo nga mahimong target sa mga programang igahin sa gobyerno aron maengganyo kini nga magpabakuna.

Tabangan usab matud pa ang dili pa bakunadong indibidwal nga ma-schedule sa mga vaccination sites.

Giklaro usab sa DILG nga girespito nila ang kagustuhan sa tawo sa hisgutanan sa pagbakuna apan angayan usab matud pang masabtan niini nga obligasyon sa gobyerno nga protektahan ang kaayuhan sa kadaghanan.

Nasayran nga dinhi sa Bukidnon, wala pay nadawat nga opisyal nga kamanduan kalabot sa mao nga pagpangayon sa listahan sa mga dili pa bakunado.



Sa interview sa RMN ngadto kang Engr. Enrique Libot, ang Provincial Director sa DILG-Bukidnon gibutyag niini nga gihulatan pa nila karon ang opisyal nga kamanduan kalabot niini.

Samtang girespito usab sa DILG ang mando sa pipila ka mga local government unit nga mag-require na sa vaccination card sa publiko kung musulod kini sa mga establishemento ug sa mga pampublikong buhatan.


Matud ni Engr. Libot nga gitugyan na sa DILG ngadto sa LGU’s ang gahom aron maprotektahan ang kadaghanan gikan sa impeksyon sa COVID-19 ilabina ning bag-ong variant karon nga Omicron.

Facebook Comments