Tumong niini nga mapalig-on ang koneksyon sa turismo ug negosyo tali sa duha ka rehiyon.
Atol sa pagbisita sa Manado, gipanghisgutan sa mga representante sa Davao ang posibleng kooperasyon sa turismo, pamuhunan, ug pag-abli pag-usab sa Davao–Manado nga ruta sa eroplano. Gipasiugda usab sa City Tourism Office ang mga atraksyon sa Davao ug ang potensyal niini isip ganghaan sa Mindanao.
Sumala sa mga opisyal, gilauman nga ang pagbalik sa direktang flights makadugang sa ihap sa mga turista ug makapalig-on sa relasyon sa katawhan sa duha ka siyudad. Bisan wala pa’y insaktong iskedyul, giila kini nga dakong lakang padulong sa pagpasig-uli sa air connectivity.
Nasayran, kaniadto gisilbihan ang maong ruta sa Sriwijaya Air (2007) ug Wings Air (2008) sa mga unang tuig, ug gilunsad pag-usab sa Garuda Indonesia niadtong 2019, apan naputol tungod sa ubos nga passenger ug cargo volume ug sa epekto sa pandemya niadtong 2020. Gilauman karon nga mas mapalig-on ang demand aron masiguro ang malungtarong operasyon sa ruta.
RadyoMaN Kareen Beltran
