Drayber sa motor nga lango sa ilimnong makahubog, patay human mibangga ang gimanehu sa nakaparadang pizon

Patay ang drayber sa usa ka single motor nga gituohang lango sa ilimnong makahubog human nga mibangga ang gimanehuan niini ngadto sa usa ka nakaparadang pizon pasado ala 1:20 sa kadlawon kagahapong adlawa didto sa Sitio Ticub, Barangay Pamotolon, Kalilangan, Bukidnon.

Giila ang biktima nga si Jalel Andam, 22 anyos, ulitawo, ug residente sa Purok-4, East Poblacion, Kili-kili, Wao Lanao Del Sur.

Sumala sa report sa kapulisan, gadagan gikan sa west nga direksyon ang biktima sa dihang pag-abot sa lugar nadisgrayahan, wala niini mabantayi ang mga signages nga nakamontar sa area sa gapadayon nga pagtrabaho sa dalan, hinungdan nga mibangga ngadto sa nakaparadang pizon.

Sa kakusog sa impak, nakaangkon og grabeng bun-og ug pangos sa kalawasan ang drayber nga gisuwayan pa og dala sa balay-tambalanan apan gideklara ng dead-on-arrival sa doctor.

Samtang samaron usab ang duha ka angkas sa maong single motor nga giilang sila Warren Flores, 18 anyos, ug Johnle Ramos, 22 anyos nga mga residente sa Wao, Lanao Del Sur.

Gikustodiya na karon sa Kalilangan Municipal Police Station ang motorsiklong gisakyan sa mga biktima alang sa tokmang disposasyon.