Naaresto ang usa ka minyo nga lalaki human gilusad ang drug buy-bust operation sa mga kapulisan pasado alas 10:20 sa buntag adtong Sabado didto sa Purok-1, Barangay Poblacion, Kadingilan, Bukidnon.
Giila ang suspek nga si Felesardo Cumamao Jurado Jr., alyas “Jun-Jun”, 38 anyos, minyo, walay trabaho, ug residente sa Purok-7, Barangay Baroy, Kadingilan, Bukidnon.
Nakompiska gikan sa posesyon sa suspek ang usa ka pakete sa gituohang drogang shabu nga mutimbang og 0.07 gramos ug mukantidad og P500.00.
Narekober usab ang buy-bust money nga P820.00 ug mga nagkadaiyang drug paraphernalia.
Gidala sa Kadingilan Municipal Police Station ang dinakpang suspek lakip ang mga nakompiskang ebidensya nga layong iturn-over sa Bukidnon Provincial Forensic Unit, Malaybalay City alang sa eksiminasyon.
Samtang ginaandam na ang kaso sa paglapas sa RA 9165 kon Comprehensive Dangerous Drugs Act of 2002 batok sa dinakpang suspetsado.
Facebook Comments
