Duha ka tawo patay human misukol sa managlahing operasyon sa kapulisan

Davao City – Laing duha ka drug personality ang misukol sa mga awtoridad human gikasa ang managlahing buy bust operation sa kapulisan sa Tugbok ug Toril nga miresulta sa ilang kamatayon.

Sumala sa report sa Tugbok Police Station, nisukol ang Top 4 drug watchlist nga si Jumar Luminding, alyas Mar, 28 anyos, taga Deca Homes, Esperanza, Tigatto, Buhangin District, Davao City human mibunot sa iyang .38 caliber revolver sa dihang nakamatikud kini nga pulis ang iyang katransakyon. Narekober sa crime scene ang usa ka .38 caliber revolver ug buy-bust item nga 0.24 grams nga gituhoang shabu.

Samtang laing drug pusher ang nisukol sa Toril Police Police Station alas 10:45 sa gabii sa Mayo 1, 2023 sa Brgy. Lizada, Toril, Davao City. Ang suspek nailang Omar Polpol Barayman, 42 anyos, driver, taga Brgy. 23-C, syudad sa Davao.

Gibana-banaang kapin 1.5 gramos ug nagkantidad og P24,000 ang mga nakuha nga shabu.

Nahinabi sa DXDC RMN Davao si Police Lieutenant Jeffrey Bangcas Deputy Chief sa Toril Police Station ug giingon niya, dugay-dugay na usab kining ginapanid-an sa kapulisan ang suspek tungod sa pagbaligya og illegal nga droga sa Toril area og nalambigit usab sa pagpangawat.

“Dugay na na ginamonitor. Taga Boulevard mana, diri lang sya gabagsak sa Toril sa may Daliao aside ana kawatan pod na sya,” sulti ni Bangcas.

RadyoMaN Don Pulayao