Dul-an P200-K shabu nasakmit sa drug den sa Panabo

Davao City- Arestado ang usa ka electrician atol sa gilusad nga buy bust operation sa Philippine Drug Enforcement Agency Regional Office XI sulod sa giingong drug den sa Panabo City, Davao del Norte.

Giila sa PDEA XI ang subject sa buy bust nga si Ronald Peñalver alyas Rong-rong, 34 anyos.

Mokantidad sa P9,000 nga shabu ang gibaligya sa suspek atol sa buy bust ngadto sa PDEA Agent nga nagsilbing poseur buyer.

Nadakpan usab sa maong operasyon ang laing duha pa ka suspek nga sila Jeremy Dulatre ug Joshua Lisen kinsa naaktuhang nag shabu session matud sa PDEA XI.

Mokabat sa 12 gramos nga mga pakete sa shabu nga adunay street value nga P180,000, ug mga assorted drug paraphernalia ang nasakmit sa mga awtoridad.

Mag-atubang ang tulo ka mga dinakpan og violation sa Section 5 (Sale of Dangerous Drugs) Section 6 (Maintenance of a Drug Den), Section 7 (Employees and Visitors of a Den), 13 (Possession of Dangerous Drugs During Parties, Social Gatherings or Meetings,) ug Section 14 (Possession of Equipment, Instrument, Apparatus and Other Paraphernalia for Dangerous Drugs During Parties, Social Gatherings or Meetings) ilawom sa Article II sa Republic Act 9165 o Comprehensive Dangerous Drugs Act of 2002.

RadyoMaN Aimee Guinita