DXDC Exclusive: Suspek giangkon ang pagpatay sa ugangan ug bayaw

75
Davao City- Giadmitar sa suspek nga si Reo Aquino Ballenas ang pagpatay niini sa iyang ugangan nga si Panfilo Manrique ug bayaw nga si Geraldine Manrique niadtong Huwebes, Mayo 13, 2022 sa Diamond Village, Matina Aplaya, Davao City sa eksklusibong interbyu sa DXDC RMN Davao sa maong suspek.

Samtang, gibutyag ni Police Major Noel Villahermosa, selos ug away mag-asawa ang ugat hinungdan sa pagkaburyong sa suspek nga nisangpot sa brutal nga pagpatay niini sa duha ka mga biktima.

Sumala ni Villahermosa, double murder case ang atubangon sa suspek kinsa kanhi na nga napriso sa susamang kaso human kini nanigbas-patay niadtong Oktobre 2020 sa San Vicente Buhangin apan nakagawas kini human nakapyansa.

Gipasalig usab ni Villahermosa, hugot nga bantayan kini sa kapulisan bisan sulod sa selda aron wala kiniy himuong dautan.

Nagbangutan ang ka-live-in ug mga tagtungod sa mga gipatay ug buot madugta sa prisuhan ang suspek aron makab-ot nila ang hustisya.

Samtang, sumala ni Grace Manlique, anak ug igsuon sa biktima nga napagan lang ang iyang amahan ug ate sa away mag-asawa lakip na niini ang pagkapungot sa suspek sa pagkapildi sa iyang gisuportahang kandidato sa Norala, South Cotabato.



Matud ni Grace gipalayas sa suspek ang igsuong si Jean nga kapuyo suspek niadtong Huwebes ug niadto kini sa ilang lugar sa Bukidnon.

Gitakdang dad-on ang patay’ng lawas sa mga biktima sa Misamis Oriental aron didto kini ipahiluna.


RadyoMaN Aimee Guinita

Facebook Comments