Giingong abduction incident sa Sta. Cruz giimbestigahan sa PNP

136
Davao City – Padayon karon nga giimbestigahan sa Sta. Cruz Municipal Police Station (MPS) ang insidente nga pagdagit sa usa ka 20 anyos nga babayi sa Barangay Bato, Sta. Cruz, Davao del Sur kaadlawon niadtong Sabado (Agosto 20, 2022).

Sa interbyu sa DXDC RMN Davao kang Police Lieutenant Florizil Villarin, Deputy Chief of Police sa Sta. Cruz MPS, gisaysay niini nga matud sa biktimang si alyas Jean gikan siya sa birthday sa iyang lola sa dihang gisugo kini papalit og ice ug didto na matud pa kini kalit nga gipasulod sa usa ka itom nga van ug gi-drop ra usab kini sa Barangay Tagabuli ug didto na matud pa siya gilugos.

Dili usab kaayo kumbinsido ang kapulisan human nga wala nihaum ang testimonya sa biktima kung unsay nahitabo sa insidente.

“Ang time gyud nga 15 minutes ingon niya (biktima) unya pag-demo namo 4 minutes (ra). Mura’g dili pa pud mabuhat gyud ang krimen nga rape sa ingon ana nga time,” sulti ni Villarin.

Ginakoordinar na usab karon sa kapulisan ang biktima ug iyang pamilya aron masayran ang tinuod nga nahitabo.

RadyoMaN Kirby Manzon

Facebook Comments