Giingong manuktokay sa Magsaysay, DavSur namali lang og balay nga gituktokan

Davao City – Giklaro sa Magsaysay Municipal Police Station (MPS) nga walay dautang tinguha ang giingong nanuktok nga binabayi kagahapon sa kaadlawon (Hulyo 22, 2022) sa Barangay Barayong, Magsaysay, Davao del Sur.

Sa interbyu sa DXDC RMN Davao kang Police Captain Harold Untalan, Acting Chief of Police sa Magsaysay MPS, giila niini ang suspek nga si Eddie Cortez, 22 anyos, taga Purok 5, Barangay Barayong. Samtang ang complainant mao si Eugene Aparise, taga Purok 1 sa susamang barangay.

Sa imbestigasyon, gikan sa party ang suspek ug hubog kini nga niuli apan lahi nga balay ang naulian niini. Giingong nagpatabang usab ang suspek human nawala ang iyang short human gibinoangan sa mga batan-ong lalaki.

“Wala siya sa iyang sarili (hubog). So, na-push niya ang pintoan. Pag-open sa tag-iya, nakita niya nga dili diay mao (nga balay), nagtakbo ‘tong (suspek), so gipahabol sa mga tanod,” saysay sa pulis.

Sa pagkakaron, gi-turn over na usab sa kapulisan sa barangay level ang insidente.

RadyoMaN Kirby Manzon

Facebook Comments