Habal-habal driver nakuhaan og dol-an P70 mil nga drogang shabu, balhog sa prisuhan sa siyudad Malaybalay

Gibalhog na sa prisuhan ang usa ka habal-habal driver human nakuhaan og dol-an P70,000 nga kantidad sa illegal nga drogang shabu atol sa gilusad nga drug buy-bust operation pasado alas 4:20 sa hapon kagahapon didto sa Purok-3, Barangay Bangcud, Malaybalay City, Bukidnon.

Muabot sa 14 ka mga pakete sa gituohang drogang shabu nga mutimbang og kapin kon kulang 10 gramos ang nakompiska sa habal-habal driver nga suspek kinsa giilang si Jee Vankerwin Almoite, 36 anyos, ulitawo, ug residente sa naasoy nga lugar.

Gikonsidera isip Priority personality ang suspek kinsa anaa sa listahan sa PNP ug PDEA sa rehiyon sa mga gapayuhot og illegal nga drogang shabu.

Gawas sa mga drogas nga nakompiska, narekober usab ang usa ka P500 bill nga buy-bust money, nagkadaiyang drug paraphernalia ug usa ka Oppo brand nga cellphone.

Gidala sa buhatan sa CIDG ang suspek sa Malaybalay City alang sa tokmang disposasyon samtang giturn-over sa Bukidnon Forensic Unit ang mga nakompiskang ebidensya alang sa dugang eksiminasyon.

Mag-atubang sa kasong paglapas sa RA 9165 kon Comprehensive Dangerous Drugs Act of 2002 ang dinakpang habal-habal driver.