LOOK| Pang pagpahigayon og medical check-up kang Marawi Vice Mayor Arafat Salic human kini maaresto kagahapon sa buntag sulod sa city hall tungod sa kasong rebelyon.(Photo: 103rd Infantry Brigade, Philippine Army)
Human ang halos duha ka tuig nga pagtago, nasikop kagahapon sa buntag (Marso 13) sulod sa city hall si Marawi City vice mayor Arafat Salic, kinsa nag-atubang sa kaso’ng rebelyon alayon sa Marawi siege niadtong tuig 2017.
Matud pa ni Col. Romeo Brawner, commander sa 103rd Infantry Brigade, Philippine Army, lakip si Salic sa Arrest Order nga gipagawas sa Office of the Martial Law Administrator niadtong Septembre 4, 2017 alang sa kasong rebelyon.
Ang maong kaso subay sa alegasyon nga dunay kalambigitan ang bise mayor sa pag-atake sa teroristang Dawlah Islamiya-Lanao sa Marawi City niadtong tuig 2017.
Miingon si Brawner nga nangatarungan si Salic nga wala siya masayod sa maong kaso.
Nalakip usab ang pangalan niini sa narco-list ni Presidente Rodrigo Duterte hinungdan nga miabot ang Philippine Drug Enforcement Agency (PDEA) ug ang Criminal Investigation and Detection Group (CIDG) alang sa interogasyon sa kasong murder ug frustrated murder.
Niadtong 2017, ang Department of Interior and Local Government (DILG) nag-instalar sa 1st city councilor isip acting vice mayor human nga wala na magpakita si Salic sa iyang buhatan.
Sama sa ubang mga dinakpan, gipailawom ang bise mayor sa proseso sama sa debriefing ug medical examination.
Si Salic anak ni kanhi Marawi Mayor Solitario Ali ug pag-umangkon ni Fahad Salic kinsa nahimo usab nga mayor sa Marawi City sulod sa tulo ka termino.
Sama ni Arafat, sila si Ali ug Fahad nalakip usab sa Martial Law Arrest Order. Una nang na-aresto si Fahad niadtong nagpadayun pa ang giyera sa Marawi City, sa usa ka checkpoint sa Misamis Oriental tungod sa illegal possession of firearms and explosives.
Human sa interogasyon kagabii, gi-turn-over si Arafat ngadto sa kostudiya sa Provincial Police Office sa Lanao del Sur. (Divina M. Suson)
