Nagpadayon karon ang gihimong pursuit operation sa 3rd Infantry Battalion, 7 th Infantry Division, Philippine Army batok sa mga nisibat nga miyembro sa New Peoples Army kon NPA.
Kini human na-engkwentro sa duha ka platoon sa Bravo Company sa 3rd IB ang 30 ka mga NPA nga ilawom sa Guerilla Front 56 niining adlaw nga Lunes sa Sitio Sangiapo, Barangay Sinuda, lungsod sa Kitaotao, Bukidnon.
Matud sa 3rd IB, nga milungtad sa napulo ka minutos ang nahitabong engkwentro.
Nasayran nga walay namatay sa habig sa kasundaluhan apan gisayran pa karon ang panig sa mga NPA tungod sa mga dugo nga nakita sa encounter site.
Narekober sa tropa sa kasundaluhan ang usa ka rifle AK47 ug magazine niini, 1 ka IED, 1 ka ENT Diagnostic Set, 1 ka handheld radio ug mga subversive documents.
Sa interview sa RMN Malaybalay ngadto kang Cpt John Tagle sa 1003rd Infantry Brigade gibutyag niini nga padayon karon ang pagpatrolya sa kasundaluhan sa mao nga dapit.
