Para kay House Deputy Speaker at La Union Representative Paolo Ortega V, papunta na sa exciting part ang impeachment trial ni Vice President Sara Duterte.
Sinabi ito ni Ortega sa pagsisimula sa ngayong araw ng presentasyon ng prosecution ng mga testigo at ebidensya para sa ikalawang article of impeachment patungkol sa alegasyong unexplained wealth na hindi umano nito idineklara sa kaniyang Statement of Assets, Liabilities and Networth (SALN).
Naniniwala si Ortega na ito na ang pinaka-aabangan sa paglilitis ni VP Sara kung saan inaasahang mabubuksan ang bank at tax records niya at mister na si Atty. Manases Carpio.
Sabi naman ni House Prosecutor at Bicol Saro Party-list Rep. Terry Ridon, ipipresenta rin ang report ng Anti-Money Laundering Council (AMLC) na nagpapakita ng bank accounts transactions ng mga mag-asawang Duterte-Carpio na may kabubuang halagang ₱6.7 billion.
Pangunahin sa mga nakalinyang testigo na ipipresenta ng prosekusyon ay sina:
• retired Sandiganbayan Presiding Justice Amparo Cabotaje-Tang
• Records Division of the Office of the Ombudsman Officer-in-Charge Atty. Karen Batu
• Company Registration and Monitoring Department-Securities and Exchange Commission Director Atty. Gerardo Del Rosario
• dating Senator Antonio Trillanes IV
