Naging posible ang muling pagkikita sa tulong ng Department of Social Welfare and Development Field Office 1, The Haven–Regional Center for Children at iba pang katuwang na ahensya.
Si Janice, 50-anyos at ina ng limang anak mula Silang, Cavite, ay nawalay sa kanyang kambal noong tatlong buwan pa lamang ang mga ito.
Ayon sa kuwento ng pamilya, nagkasakit ang isa sa kambal at naging malaking hamon para kay Janice ang pagtustos sa pagpapagamot at iba pang pangangailangan ng kanyang mga anak.
Lalo pang naging mabigat ang kanilang sitwasyon nang pumanaw ang kanyang asawa, dahilan upang mag-isa niyang harapin ang responsibilidad sa kanilang pamilya habang kapos sa pinagkukunan ng kabuhayan.
Dahil sa hirap ng kanilang kalagayan, napilitan siyang ipagkatiwala ang kambal kay Alma, 66-anyos na negosyante mula Dagupan City, sa pag-asang mabibigyan ang mga bata ng mas maayos na pangangalaga at kinabukasan.
Noong 2012, dinala ang kambal sa Dagupan City, kung saan sila nanirahan at lumaki nang malayo sa kanilang biological mother.
Lumipas ang mga taon na magkahiwalay ang mag-iina, hanggang sa magkaroon ng pagkakataong muling mabuo ang kanilang ugnayan sa tulong ng mga social worker at kinauukulang ahensya.
Makalipas ang 14 na taon, dumating ang pinakahihintay na pagkakataon para muling magkita ang mag-iina.
Ang reunion ay naging mahalagang bahagi ng proseso ng muling pag-uugnay sa pamilya matapos ang mahigit isang dekadang pagkakahiwalay.
Patuloy naman ang paggabay at koordinasyon ng mga kinauukulang ahensya upang matiyak na ang anumang susunod na hakbang para sa kambal ay naaayon sa kanilang kapakanan at pinakamabuting interes bilang mga bata. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
