Kapin 13 mil ka pesos nga drogang shabu nakompiska, babae’g lalaki dakpan

Mukabat sa kapin P13,000.00 ang drogang shabu nga nakompiska samtang duha ang dakpan human gipahigayon ang drug buy-bust operation didto sa Barangay Damilag, Manolo Fortich, Bukidnon kagahapon.

Giila ang mga dinakpang suspek nga silang Eva Libres, top priority drug personality ug Ronelio Germinal, pulos hingkod ang pangidaron ug mulopyo sa naasoy nga lugar.

Gipangunahan sa mga operatiba sa Philippine Drug Enforcement Agency (PDEA)-10 Bukidnon Provincial Office inubanan sa Manolo Fortich Municipal Police Station ug uban pa ang maong operasyon diin nakakompiska og kapin kon kulang duha (2) ka gramos drogang shabu nga gibana-banang mukantidad og Php 13, 600.00.

Gibalhog na karon sa bilangguan ang mga suspek samtang ginaandam ang kaso sa paglapas sa RA 9165 kon Comprehensive Dangerous Drugs Act of 2002.

Facebook Comments