Kapin usa ka milyong kantidad sa drogang shabu, nakompiska, duha ka mga drogista, nadakpan

Mukabat sa kapin usa ka milyon ka pesos nga kantidad sa gituohang drogang shabu ang nakompiska sa mga otoridad samtang nadakpan ang duha ka mga indibidwal sa gilusad nga drug buy-bust operation pasado alas 11:02 kagabie didto sa Purok-16A, Poblacion, Valencia City, Bukidnon.

Giila ang mga suspek nga silang Angel Kate Abila, 25 anyos, dalaga, ug residente sa naasoy nga lugar kinsa gikonsiderang Top 5 sa listahan sa PNP-PDEA sa rehiyon ug si Xerxes Theo Esteban, 24 anyos, ulitawo, ug residente sa Purok-6A, Poblacion, Valencia City.

Samtang nakaikyas usab ang laing usa nga giilang si Edelbert Godinez, 26 anyos, Top 2 sa listahan sa PNP-PDEA sa rehiyon.

Muabot sa unom ka mga pakete sa gituohang drogang shabu ang nakompiska nga mutimbang og 220 gramos ug mukantidad og kinatibuk-ang P1,496,000.00.

Gikustodiya na sa Valencia City Police Station ang mga nadakpang suspek samtang giturn-over sa Bukidnon Provincial Forensic Unit 10 sa Malaybalay City ang mga nakompiskang droga alang sa eksiminasyon.

Kasong paglapas sa RA 9165 kon Comprehensive Dangerous Drugs Act of 2002 ang atubangon sa mga suspek.