Kaso sa ambulance driver nga nakabangga-patay sa Sta. Cruz giatras

Davao City – Wala na gipadayon ang kasong reckless imprudence resulting in homicide batok sa driver sa ambulansya nga nakabangga-patay sa Barangay Tagabuli, Sta. Cruz, Davao del Sur alas-10 sa gabii niadtong Lunes (Hulyo 5, 2021).

Sa interbyu sa DXDC RMN Davao kang Police Major Crisaldo Gaila, Chief of Police (COP) sa Sta. Cruz Municipal Police Station (MPS), giila niini ang biktima nga si Julie Kayo, 18-anyos, lalaki, residente sa nahisgutang lugar samtang, ang driver mao si Reynante Fresno, 46-anyos, nagmaneho sa ambulansya nga gipanag-iyahan sa Local Government Unit (LGU) Bagumbayan, Sultan Kudarat.

Saysay niini nga padulong sa Davao City ang sakyanan sa dihang wala niini nabantayan ang kalit nga pagtabok sa biktima hinungdan nga nabanggaan kini ug gidekalara nang dead on arrival sa Davao del Sur Provincial Hospital.


Gibutyag ni Gaila nga nagbaton na og settlement o nagkasabot na ang duha ka partido nga dili na ipadayon ang kaso bugti sa pagbayad og P90,000 sa driver ngadto sa pamilya sa biktima.

Nanghinaut usab ang police official nga malikayan na ang disgrasya sa lugar pinaagi sa mga proyekto sa gobyerno sa dalan nga maghatag og proteksyon sa katawhan labi na sa mga pedestrian.

“Makita nato diri sa Sta. Cruz, naa nay mga gina-construct nila, ongoing construction nila sa mga overpass. Isa pud na sa interventions sa atoang national government para malikayan ang mga pedestrian nga mabanggan kay luoy pud kaayo sila mutabok pa,” sulti ni Gaila.

RadyoMaN Kirby Manzon

Facebook Comments