Nagalab-ot na sa 1,877 ang kaso sang balatian nga dengue sa probinsya sang South Cotabato halin Enero tubtob Mayo 25 subong nga tuig nga mataas sang 122.1% kumparar sang nagligad nga tuig sa kapareho nga period.
Base sa datos sang Provincial Epidemiology Surveillance Unit sang Provincial Health Office sang South Cotabato yara naman sa onse ang patay sa nasambit nga balatian sa diin duha ang narekord sa banwa sang Banga kag Polomolok, samtang tig-isa naman ang patay sa banwa sang Norala , Sto. Niño, Surallah, Tampakan , T’boli kag Tupi.
Nagapanguna naman sa may mataas nga kaso sang balatian nga dengue ang Koronadal City nga may 389, Tantangan -246, Tupi -206, Polomolok -203, Banga -201, Surallah -185, T`boli -126, Tampakan -112 , Norala -93, Lake Sebu -59 kag Sto. Niño -57.
Nahibaluan nga ang halos nga mga banwa kag syudad sang Koronadal ang nagsaka ang kaso sang balatian nga dengue sini kumparar sang nagligad nga tuig sa kapareho nga period.
Samtang ang mga barangay naman nga may clustering of cases amo ang mga Barangay sang Lampari kag San Vicente sa banwa sang Banga, Brgy. GPS, San Isidro, Zone I, Caloocan, Sto. Niño, Zone III & Sta. Cruz sang Koronadal City, Poblacion & Liberty sang Norala, Polo, Magsaysay, Cannery Site & Poblacion sang Polomolok, Brgy. Poblacion, Sto. Niño, Brgy. Libertad, Naci, Centrala, Lamsugod & Dajay sang Surallah, Brgy. Poblacion & Liberty sang Tampakan, New Iloilo, Maibo, Poblacion, San Felipe & Dumadalig sang Tantangan, Brgy. Laconon, Tboli, Brgy. Kablon, Bunao, Poblacion & Polonuling sang Tupi.
Ginpahayag naman ni Assistant Provincial Health Officer Dra. Allah Baby Vingno nga wala pa nadeklarar ang outbreak sang balatian nga dengue sa probinsya bisan pataas ang kaso sini.
May-angot sini, ipadayon nila ang pagpakigsapol sa liga ng mga barangay para sa full implementation sang Aksyon Barangay Kontra Dengue kag pagbalik sang adbokasiya nga “lima ka minuto lang kada adlaw” ipakulob ang mga butang nga ginaitlugan sang lamok nga nagadala sang balatian nga dengue.
