Giila ang biktima nga si Ruben Escultor Boliboli, 45 anyos, minyo, ug residente sa Purok-4A, San Roque, Barangay Lumbo, Valencia City samtang ang suspek nga uyuan giilang si Limuel V. Pestin, 46 anyos, minyo, laborer ug residente sa naasoy nga lugar.
Sumala sa report sa kapulisan, nga natigayon ang insidente sa panimalay sa suspek kung asa gisuwayan matud pa siya og pusil sa iyang pag-umangkon apan wala kini maintimano.
Midepensa ang suspek ug didto natigbasan niini ang biktima hinungdan sa kamatayon.
Ulahi na nga nahibal-an sa suspek nga iya man diay’ng pag-umangkon ang misuway og pusil kaniya tungod kay nakabonnet kini.
Gisuwayan pa og dala sa balay-tambalanan ang biktima apan gideklara na kining dead-on-arrival sa doctor.
Away sa yuta ang gidudahang hinungdan sa maong krimen.
Narekober sa crime scene ang usa ka unit sa kalibre .38 nga pistola, duha ka basyo sa bala niini, upat ka mga buhing bala, ug sundang nga gigamit sa pagtigbas patay sa biktima.
Gipahiluna na sa punerarya ang patayng lawas sa biktima samtang gidala sa Valencia City Police Station ang suspek diin ginaandam ang kaso batok kaniya.
