Line fault ug human error, nasutang mga rason sa sagad nga pagkawala sa linya sa sugang-dagitab gikan sa Maramag padulong sa dakbayan sa Malaybalay

Giangkon karon sa Bukidnon Sub-Transmission Corporation (BSTC) nga “line fault” ug “human error” ang rason sa sagad nga pagkawala sa linya sa sugang-dagitab gikan sa lungsod sa Maramag padulong sa siyudad sa Malaybalay.

Atol sa regular session sa Sangguniang Panlalawigan (SP)-Bukidnon karong semanaha, diin dinapit nga bisita si BSTC OIC-COO Romnick Marcela, gibutyag niya nga ang kasagarang hinungdan sa pagmalfunction sa 69Kv line gikan sa Maramag paingon sa Malaybalay City ang line fault ug human error.

Ang 69Kv station nga gidumala sa BSTC gilangkuban sa Camp 1 Substation, Baradias Substation, Anahawon Substation, BUSCO Milling, Lumbo Substation, Dabong2x Substation, Aglayan ug Casisang Substation.

Giklaro usab ni First Bukidnon Electric Cooperative (FIBECO) Manager nga si Antonio N. Obice Jr, nga dili kontrolado sa FIBECO o BUSECO ang blackout tungod kay gasunod usab sila sa protocol gikan sa National Grid Corporation of the Philippines (NGCP).

Samtang giduso usab ngadto sa SP-Bukidnon ang pagtukod sa Power Source sa Aglayan Substation, diin pinaagi niini, dili maapektuhan o mawad-an og suplay sa kuryente ang area sa dakbayan sa Malaybalay kung ugaling adunay problema sa supply sa mga lugar nga anaa sa habagatang bahin sa Bukidnon.

Facebook Comments