Tapaz, Capiz – Naglab-ot na sa 114 ka mga nanari-sari nga kalibre sang armas luthang ang natigayon nga ginsungka sa Tapaz Municipal Police Station. Ini ang ginpahayag ni Police Senior Inspector Edwin Luces, hepe sang Tapaz PNP. Suno diri nga kadamuan sa nasambit nga mga armas amo ang homemade shotgun nga wala sang lisensya kag ang iban, nag-expired na.
Ginpasalamatan man ni Luces ang bulig kag kooperasyon sang mga barangay officials sa ila kampanya nga Tokhang Kontra sa Guinadili-an nga Pusil nga naghatag sang dako nga pagkontrebwer, rasun nga nagmadinalag-on ang ila kampanya.
Ginpahayag dugang ni Police Senior Inspector Edwin Luces nga pasangkaron pa gid sang iya pamunuan ang ila kampanya bangud madamo pa sang mga barangay nga wala pa sang may ginsungka nga armasluthang.
Angut sini, nagpangabay man ini sa mga residente nga isungka na ang ila ginahuptan nga armas, agud masiguro man ang ila seguridad bangud limitado lamang ini nga kahigayunan nga ginhatag sa ila sang kapulisan. Nahibaluan nga isa ang banwa sang Tapaz sa may pinakadamo nga armas nga ginsungka sa bug-os nga probinsya.
