Maa PNP: Dayo nakuhaan og kapin milyon nga kantidad sa shabu

Davao City – Nasang-atan na og kasong may kalapasan sa Republic Act 9165 kon Comprehensive Dangerous Drugs Act of 2002 sa Maa Police Station ang usa ka dayo sa siyudad sa Dabaw.

Ang suspek nga si Nahser Saro, Alyas Utol, 32 anyos, minyo, natawo sa Molundo Lanao Del Norte, ug temporaryo nagpuyo sa Purok 4-A, Isla Verde, Boulevard nakuhaan og lima ka dagkong pakete sa gitohoang shabu nga mutimbang sa 90 ka gramos ug dunay kinatibuk-ang kantidad nga 1.6 milyon ka pesos atol sa buy-bust operation nga gikasa sa Maa PNP, NBI XI, sa pakig-alayon sa San Pedro PNP diin gihimo ang traksisyon sa town house sa Barangay 10-A ning siyudad pasado 11:00 sa gabii.

Nakuha pa gikan sa suspek ang 140mil ka pesos nga tig-usa ka libo ug tinuod nga 500 pesos nga mark money ug cellphone nga maoy gigamit sa operasyon sa suspek.

Natiktikan ang operasyon sa suspek gumikan sa inpormasyon nga nahipos sa mga otoridad hinungdan makuti nga pagpapaniid ang gihimo hangtud nahog sa mga kamot sa mga kapulisan ang suspek.

Ginasuta na usab karon sa mga tinugyanan sa balaod ang mga tawong nahimong customers ug kasabot sa ilegal nga droga ni Saro.

Sa karon, gipaabot nalang sa Maa PNP nga mag- elevate sa korte ang kaso aron mapaguwaan na kini og commitment order aron mabalhin sa Maa City Jail si Saro kinsa balhog karon sa Maa PNP Cell.



RadyoMaN Joel Viray

Facebook Comments