Mag-uuma nadakpan sa kasong VAWC

Malampusong nasikop sa mga kapulisan ang usa ka wanted nga mag-uuma sa paglapas sa Violation Against Women and their Children kon VAWC atol sa operasyong gipahigayon pasado alas 6:15 sa buntag kagahapon didto sa Sitio Palao, Mabuhay, San Fernando, Bukidnon.

Giila ang suspek nga si Rhian Roy Virgo, 31 anyos, ulitaw, mag-uuma, ug residente sa Purok-5, Laligan, Valencia City, Bukidnon.

Gipangunahan sa mga personahe sa San Fernando Municipal Police Station ang maong operasyon pinasikad sa gahom sa warrant of arrest sa paglapas sa RA 9262 kon Anti-Violence Against Women and Their Children nakadokit ilawom sa criminal case no. 39538-22, nga gi-issue ni Wilfredo G. Bibera Jr., Presiding Judge sa Regional Trial Court (RTC), 10th Judicial Region, Branch 46, Malaybalay City, Bukidnon pinitsahan Setyembre 12,2022 ug adunay piyansang girekomenda nga mukabat sa P36,000.00 alang sa temporaryong kagawasan.

Nakakustodiya karon sa San Fernando Municipal Police Station ang suspetsado alang sa tokmang disposasyon.