Makusog nga baha sa Usugan river sa lungsod sa Tambulig, nilapas na sa critical level

31
Tambulig, Zamboanga del Sur – Nilapas na sa critical level ang bul-og sa tubig-baha sa Usugan river sa Tambulig ning probinsya sa Zamboanga del Sur.
Epekto kini sa pagbundak sa makusog nga ulan sa naasoy nga lungsod gumikan sa localized thurderstorm kagahapon sa Zamboanga del Sur ug sa kasikbit nga lalawigan sa Misamis Occidental.
Sumala ni Mayor Charlotte Panal, gitahasan niya gilayon sa Tambulig PNP ug ang Municipal Disaster Risk Reduction Management Office (MDRRMO) nga magpahigayon ug forced evacuation sa mga komunidad ug mga barangay nga duol sa suba sa Usugan.
Matod niya, ang Barangay Calolot ang pinakagrabe nga naapektuhan gumikan kay nalunopan man sa tubig-baha ang dakung bahin niini.
Sigon ni Mayor Panal, bandang alas 3:47 kagahapon August 3, 2022 sa dihang gasugod pag-awas ang tubig sa Usugan river.
Gawas sa Barangay Calolot, gibaha usab ang mga kabalayan ug pananom sa Barangay New Village, Tungawan, Lower Usugan, San Jose, ug Angeles.
Kasamtangan pang-gimonitor ang kahimtang sa Usugan river gumikan sa nagpadayon gihapon nga pagbundak sa pipila ka bahin sa probinsya og pipila usa ka mga bahin sa Zamboanga Peninsula. (Pictures MDRRMO Tambulig)

Facebook Comments