Mayor sa Don Marcelino, Davao Occidental pa-imbestigahan sa ombudsman

Davao City – Midangop na sa Office of the Ombudsman Mindanao ang usa sa mga residente sa munisipalidad sa Don Marcelino, Davao Occidental tungod sa reklamo niini nga ang road right of way gipatarukan og municipal tourism building ingun man mga establisemento sa pribadong negosyante sa maong lungsod.

Base sa sulat nga gipadala sa ombudsman ni Atty. Ruby Quilban, legal counsel sa complainant, nga pa-imbestigahan sa maong ahensya ang pagpatukod ni Mayor Michael Maruya ug tourism building sulod mismo sa road right of way.

Kahinumduman nga midangop sa DXDC RMN Davao ang complainant tungod kay makadaghan na niini gireklamo sa buhatan sa mayor ang mga edepiso nga nakasalipod sa iyang propiedad apan walay nahimong aksyon ang hepe ehekutibo.

Gihuptan usab sa complainant ang sertipikasyon gikan ni Engr. Bernard Delute, Municipal Planning and Development Coordinator nga ang 60 metros nga gibarogan sa gireklamo nga gambalay road right of way.

Gisuwayan usab sa DXDC RMN Davao og kuha’g reaksyon si Maruya bahin sa nahisgutan apan ning panahon sa pagsibya, wala pay tubag niini ang alkalde.

RadyoMaN Erin Lumosbog