Mayor Sara: Pagpatuman sa lockdown ug martial law ‘fake news’

29
Davao City – Giklaro ni Davao City Mayor Sara Duterte-Carpio nga walay kamatuoran ang mikatag karon sa social media mahitungod sa ipatuman sa national government nga lockdown o martial law sa Pilipinas.

Matud ni Mayor Sara (sa interbyu sa city-owned radio), ‘fake news’ ang maong mga inpormasyon nga nag-awhag sa publiko nga mag-andam og pagkaon nga molungtad og pila ka adlaw o semana tungod sa pagdeklara ni Presidente Rodrigo Duterte og total lockdown nga magdili sa katawhan sa paggawas sa ilang panimalay.

“Didto sa voice message is magpalit na daw og mga pagkaon tungod kay naa dawy lockdown, somewhat of a martial law nga i-implement sa atong nasud. Dili po ni siya tinuod,” tataw sa alkalde.

Gipasabot ni Duterte-Carpio, adunay basehan o guide ugaling magpatuman man og martial law sa nasud. Wala usay kalabutan ang pandemic sa pagdeklara sa balaod militar.

Samtang, dili usab tinuod ang mikatag nga istorya nga adunay ipatumang lockdown sa Davao City sa Enero 15, 2022, rason nga walay angay ikabalaka ang Davaoeños.

RadyoMaN Kirby Manzon

Facebook Comments