Membro sang militar nga taga-Mambusao, patay sa engkwentro sa Negros Oriental!

55

Mambusao, Capiz- Patay ang isa ka suldado nga tagabanwa sang Mambusao sa nagluntad nga engkwentro sa Barangay Sandayao, Guihulngan City, Negros Oriental sang nakaligad nga Mierkules.
Patal nga pilas sa iya dughan ang naangkon sang biktima nga nakilala kay Corporal Arjun Guillermo, tumandok sang Pangpang Sur banwa sang Mambusao.
Si Guillermo ang membro sang 62nd Infantry Batallion(IB) sang Philippine Army kag na-asign sa nasambitan nga lugar.
Suno sa impormasyon, nagresponde sa lugar ang tropa matapos nga nakabaton sang report sang mga residente nga may yara sang presensya sang armado nga grupo.
Una nga nagluntad ang bayluhanay sang lupok mga alas 5 sang hapon sa tunga sang grupo sang militar kag ginapahayag mga katapo sang rebelde nga New Peoples Army(NPA) nga ginabanta nagalab-ot sa napulo(10) tubtob kinse(15) ka bilog.
Ginsundan ini sang lukpanay mga alas 7 sang gab-i kag didto na napilasan si Guillermo.
Bangud sa maulanon nga tiempo kag madulom nga palibot, nadugayan antes nga napaguha sa encounter site ang pilason nga si Guillermo. Ini ang nag-angkon sang patal nga pilas sa iya dughan.\
Si Corporal Arjun Guillermo ang nagsulod sa serbisyo sang tuig 2013.
Ang bangkay sini ang natalana nga igabalik diri sa probinsya sang Capiz.

Facebook Comments