Mga opisyal ng brgy. Muzon sa San Jose Del Monte City sa Bulacan, inireklamo sa Ombudsman dahil sa umano’y anomalya sa pamamahagi ng SAP

19538

Naghain ng reklamo sa Ombudsman ang grupong pinoy aksyon laban sa mga opisyal ng Barangay Muzon sa San Jose Del Monte City sa Bulacan.

Ito’y kaugnay sa paglabag umano ng mga ito sa Anti-Graft And Corrupt Practices Act gayundin sa probisyon ng Republic Act 11469 o bayanihan to heal as one law dahil sa maanomalyang pamamahagi ng Social Amelioration Program o SAP.


Kabilang sa mga inireklamo ng grupo sina Brgy. Muzon Chairman Marciano Gatchalian gayundin ang mga kagawad na sina Dionisio Aue, Edgar Celis, Angelito Sarmiento, Elizabeth Valerio, Erick Ignacio, Rustico Gatchalian at Nomeriano Gojo Cruz.

Batay sa tatlong pahinang reklamong inihain ng pinoy aksyon sa tanod bayan, hindi sinunod ng mga inirereklamong opisyal ang protocols ng Department of Social Welfare And Development o DSWD sa pamamahagi ng SAP forms.

Maliban dito, aabot sa pitumpung residente ng Marigold Village ang hindi umano nakatanggap ng ayudang pinansyal kahit pa pumirma ito para sa ikalawang tranhce ng SAP.

Una nang dumulog ang mga apektadong residente kay San Jose Del Monte City Mayor Arthur Robes para imbestigahan ang insidente dahil sa pagkawala ng pondo para sa mga taga Marigold Village.

Maliban dito, hiniling din ng grupo sa kanilang reklamo sa ombudsman na isailalim sa lifestyle check si Brgy. Chairman Gatchalian dahil sa hindi nito pagdideklara ng tama sa kaniyang mga ari-arian.




Facebook Comments