Minors nga giingong wala mibayad og plite sa tricycle, na-rescue

Davao City – Anaa na sa kustodiya sa Tagum City Police Station ang tulo ka menor-de-edad nga nahisgutan sa usa ka viral nga post kalabot sa insidente nga giingong wala nagbayad og plite sa traysikel sa Tagum City.

Sumala sa kapulisan, kauban na sa mga bata ang ilang mga ginikanan aron maseguro ang hustong disposisyon ug pagproseso sa kaso sumala sa balaod.

Gibutyag sa PNP nga ilang gipahigayon ang angay nga interbensyon ubos sa child protection procedures aron mapanalipdan ang kaayohan sa mga menor-de-edad. Gani, gitubag usab ang reklamo sa publiko pinaagi sa hustong ug legal nga pamaagi.

Samtang nagpadayon ang imbestigasyon, gihangyo sa kapulisan ang publiko nga likayan ang pagpakaylap sa dili beripikadong impormasyon nga posibleng makadaot sa pribasiya ug dignidad sa mga menor-de-edad ug ilang pamilya. Nagpasalig usab ang Tagum City Police Station nga magpadayon sila sa pagmonitor aron maseguro ang kaluwasan ug kahapsay sa dakbayan.

RadyoMaN Kareen Beltran