Ginkilala an namatay nga biktima nga hi Susana Sagaldia, 35 anyos. Samaran naman an asawa hine nga hi Loreto Sagaldia, 45 anyos, anay OFW; ngan mga anak hira Jayson Sagaldia, 18 anyos ngan alyas lyn, 17 anyos.
Suspek ha mao nga panhitabo an ‘karelasyon’ ni Misis nga kinilala kan Albert Escabosa, 47 anyos nga residente han Tomas Oppus Southern Leyte.
Ha interview han RMN Tacloban kan Poice Major Alfred Reynald Mendoza Daus, Acting Chief of Police han Sogod MPS, alas 3:30 han aga kakulop, pumakadto ha panimalay han mga biktima an suspek ngan didto na ginbuhat an panigbas kan Susana ngan ha asawa ngan mga anak hine.
Nasalbar han tulo nga biktima an ira kinabuhi mahuman ine kumalagiw ha lugar kun diin dayon hira nga gindara ha hospital agud tambalon.
Nagawas naman ha imbistigasyon han kapulisan, gin-aaligar selos an hinungdan ha pagbuhat han krimen tungod nga hi Susana ngan an suspek in nagkaada hin relasyon samtang nagtatrabaho an asawa hine ha iba nga nasod. Nagkaada pa gihapon hira anak nga didto yana nag-uukoy ha pamilya han suspek.
Nakilal-an an suspek ha panhitabo matapos positibo ine nga igintudlok han usa ha mga biktima.
Nasabtan gihapon nga matapos mabuhat an krimen in umuli an suspek ha Tomas Oppus ngan didto na ine nagpakamatay matapos nagbitay han iya kalugaringon. (Photo credits to Yolac Etraton)
