Patay ang anay miyembro sang New People’s Army ukon NPA, matapos nga tiruhon sang anay mga kaupdanan sini sa grupo sa Sitio Sobuy, Barangay Datal D`lanag, Tboli, South Cotabato.
Ginkilala ang biktima kayTammy Adam Taw, residente sang nasambit nga lugar kag tigayon na nga nagbalik sa sabak sang gobyerno.
Sa imbestigasyon sang T`boli MPS, alas 6:30 sang aga sang Setyembre 1 , nagapahuway sa sulod sang iya nga balay ang biktima sang ginsulod sang suspek nga si Ka Jord kag isa pa ka kaupod sini nga armado sang AK47.
Magapalagyo pa kuntani ang biktima, apang gintiro ini sang yara sa napulo ka mga armado nga persona nga yara sa gwa sang balay sang biktima gamit ang AK47 rifle, M16 rifle kag short firearm.
Nakaangkon sang igo sang bala ang biktima sa wala nga mata kag dughan nga nangin tanaan sang iya kamatayon.
Nakuha naman sa crime scene ang 1 ka unfired cartridge sang AK 47 rifle.
Bag-o pa man nagbiya sa lugar ang suspek nga si Ka Jord, miyembro sang Front 73, Sparrow Unit , nagbilin ini sang sulat nga sila ang responsible sa insidente tungod ang biktima nga si Tammy Adam Taw upod ang anak sini nga si Boboy Badang Taw ang nagbiya sa grupo kag nagsurender dala ang 2 ka units sang AK 47 rifle.
