Ivisan, Capiz – Yara na sa kustodiya sang Ivisan Municipal PNP kag natalana nga igaturn-over sa DSWD ang duha ka menor de edad nga nadakpan nga nagkawat sang motorsiklo sa Barangay Cudian,Ivisan, Capiz.
Ginbilin sang biktima nga si Danilo Arciga 52-anyos, ang iya nga motorsiklo sa ila balay bangud may yara ini sang ginkadtuan, apang nagbalik matapos nadumduman nga wala ini ma-lock.
Sang nakabalik na ini wala na ang ginbilin nga motorsiklo.Ginpahayag sang mga kalapit balay ni Arciga nga ginsakyan sang duha ka mga suspek nga menor de edad padulong sa syudad sang Roxas ang iya nga motorsiklo.
Nahibaluan nga nahubsan sang gasolina ang amo nga motorsiklo rasun nga napilitan nga itulod sang mga suspek. Ginlagas ni Dennis Arciga, anak sang biktima ang mga suspek kag naabtan sini malapit na sa isa ka gasoline station Barangay Cagay syudad sang Roxas.
Sa bulig man sang mga tanod kag pulis nga yara sa outpost sang Barangay Cagay, nadakpan ang duha ka mga menor de edad. Ang mga suspek nga menor de edad, residente sang Barangay Libas, Roxas City kag Brgy. Salocon, Panit-an, Capiz.
