Na-missing nga mananagat, nakit-an ug naluwas human sa kapin 3 ka adlaw sa Mati

Davao Oriental – Malampusong naluwas ug nakit-an ang usa ka 40-anyos nga mananagat nga si Junie Patchico, residente sa Magsaysay 17-B, Mati City, Davao Oriental, human kini na-missing sulod sa kapin tulo ka adlaw.
‎

‎Sa impormasyon gikan sa Coast Guard Station Davao Oriental (CGS DAVOR) nakit-an siya ni Rohilyo Bariga sa vicinity sa Barangay Mayo, Mati City, alas-5 sa buntag niadtong Agosto 26, ug gihatagan dayon og assistance aron maseguro ang iyang kaluwasan.
‎

‎Dugang pa nga mitubag dayon ang personnel sa Coast Guard Station Dahican, kauban ang City Disaster Risk Reduction and Management Office (CDRRMO)-Mati, ug gitabangan si Patchico sa pag-rescue ug pagdala ngadto sa Davao Oriental Provincial Medical Center (DOPMC) alang sa medical evaluation, treatment ug observation.
‎

‎Kahinumduman nga sa unang impormasyon nga nadawat sa Coast Guard, niadtong Agosto 23, 2026, kauban ni Patchico ang ubang tripulante sakay sa usa ka fishing vessel, apan sa ilang pagmata, nadiskobrehan sa mga kaubanan niini nga wala na kini sa ilang gisakyan ug gilayon nga gi-report ang insidente aron masugdan ang search and rescue operation.

RadyoMaN Wil Duran