Ya dale aviso el Zamboanga City Disaster Risk Reduction Management Office (ZCDRRMO) cay nuay suspensyon del clase o trabajo na mga oficina del govierno este dia.
Na entrevista del RMN Zamboanga enantes aga con el hefe del CDRRMO Dr. Elmeir Apolinario, solamente aquellos lang mga lugar o escuela sumido na agua del avenida amo fuede declara nuay clase, defende pa na declaraccion del principal de escuela y el capitan de barangay.
Asegun con Apolinario, continuando chene clase y trabajo cay base na aviso del National Disaster Risk Reduction Management Council (NDRRMC) nuay razon para suspindi el clase y trabajo este dia porcausa cay cuantos isolated rainshowers y tunderstorms lo mismo Inter-tropical Convergenze zone (ITCZ) lang el cosa ta experiencia el fueblo.
Ta dale aviso si Apolinario con el publico para chene syempre quidao porcausa cay posible hay cay ya tambien el fuerte aguasero luego tarde aqui na ciudad.
El CDRRMO ta adverti con el mga Barangay Disaster Teams para esta alerto y recomenda el suspensyon del clase si necesita. – Bhong Simbajon/RMN News
