CAUAYAN CITY – Matagumpay na isinagawa ng OWWA Regional Welfare Office 2 (RWO2) ang Information Caravan at Entrepreneurial Development Training (EDT) sa ilalim ng Balik Pinas, Balik Hanapbuhay (BPBH) Program para sa 55 distressed OFWs mula sa hilagang Isabela.
Nagbigay ng mensahe si Ms. Alma Gammad bilang kinatawan ni Regional Director Virsie Tamayao, kung saan pinasalamatan niya ang mga kalahok. Hinikayat din niya ang mga ito na samantalahin ang mga oportunidad mula sa reintegration programs ng OWWA upang makapagtayo ng sariling kabuhayan.
Tinalakay naman ni DTI Trade Analyst Wyne Aya Flores ang kahalagahan ng kaalaman sa negosyo. Binanggit niya na mahalaga ang pagiging handa sa pagnenegosyo, hindi lamang sa aspeto ng puhunan kundi sa kaalaman sa pamamahala at pagpapalago ng negosyo. Ayon sa kanya, sa pamamagitan ng sapat na kaalaman, maaaring maging matagumpay at tuloy-tuloy ang negosyo ng mga OFW.
Layunin ng training na bigyang-kaalaman at gabay ang mga kalahok sa pagsisimula ng kanilang sariling negosyo bilang hakbang sa isang mas matatag na kinabukasan.
Sa kabuuan, ang aktibidad ay patunay ng patuloy na pagtutok ng OWWA sa kapakanan ng mga OFW — hindi lamang sa panahon ng kanilang pag-aabroad, kundi lalo na sa kanilang pagbabalik at muling pagsisimula sa sariling bayan.
