Patay’ng lawas sa lalaki napalgan, samad-dinunggaban nakita sa kalawasan sa biktima

31
Nagbuy-od kilid sa dalan ug wala nay kinabuhi ang lawas sa usa ka lalaki nga napalgan sa mga kapulisan pasado alas 11:16 sa buntag kagahapon didto sa Purok-5, Barangay 9, Malaybalay City, Bukidnon.

Gipanag-iyahan ang maong patay’ng lawas sa usa ka Warren Ojas, 20 anyos, ulitawo, ug residente sa naasoy nga lugar nga ang kinsa nakasuot og puti nga t-shirt ug short pants.

Nakaangkon og 13 ka mga samad-dinunggaban sa nagkadaiyang parte sa kalawasan ang biktima partikular na sa dughan ug tiyan nga bahin niini.

Sumala sa imbestigasyon sa mga kapulisan, pasado alas 6 sa gabie, Martes, Hulyo 19, 2022, namatikdan ang maong biktima nga nakig-inom sa wala maidentipikang lalaki ug babae sulod sa usa ka imnanan sa dakbayan kapin kon kulang 50 metros ang gilay-on kung asa napalgan ang patay’ng lawas sa biktima.

Giturn-over ngadto sa Bukidnon Provincial Medical Center (BPMC) ang patay’ng lawas sa maong lalaki samtang padayon pa karon ang ginahimong imbestigasyon sa mga kapulisan kabahin sa pag-ila sa mga suspek.

Personal nga bangi ang ginalantaw nga motibo sa maong krimen.

Facebook Comments