Davao City – Wala’y nakita nga problema ang pipila ka mga PUV drivers sa Davao City sa pamahayag ni Department of Energy (DOE) Secretary Sharon Garin nga dili na mobalik sa presyo nga ₱55 ang litro sa petrolyo.
Sa pakighinabi sa DXDC RMN Davao kang Elmer Apayao, Byaheng Matina Aplaya–Agdao, Davao City, giingon niya nga wala na silay mahimo kondili mosunod sa panggamhanan, tungod kay mao kini ang tinugyanan sa katungdanan sa pagdumala sa presyo sa petrolyo.
Matud pa sab ni Jason Amarillo, Byaheng Acacia, Davao City, nga sa ₱55 matag litro, aduna pa silay madala alang sa pamilya. Sukwahi karon nga anaa na sa ₱80 kapin ang gasolina, lisod na ang adunay dakong ginansya.
Samtang sa pamahayag sa drayber nga si Danilo Avance, kinahanglan balansehon sa panggamhanan ang mga pamaagi aron sab nga adunay saktong panginabuhian ang katawhan. Matud pa sa mga drayber, dili usab sila buot nga motaas ang presyo sa plite alang sa mga pasahero.
RadyoMaN Bien Abanos
Facebook Comments
