Pagbaton og backyard garden, girekomenda sa CAGRO

Davao City – Gidasig sa City Agriculturist’s Office (CAGRO) ang matag miyembro sa panimalay sa Davao City sa pagsugod og backyard gardening isip kabahin sa pagpalig-on sa seguridad sa pagkaon ug pagpangandam batok sa epekto sa nagpadayon nga init nga panahon.

Matod ni CAGRO Officer-in-Charge Dr. Antonio Obsioma, dako ang ikatabang sa pagpananom og kaugalingong utanon sa matag panimalay aron adunay seguradong mapanguhaan sa presko ug masustansyang pagkaon bisan pa sa posibleng kakulang sa suplay sa merkado.

Gipasiugda ni Obsioma nga bisan gamay lamang nga luna, sama sa likod-balay, atop, o gamit ang mga recycled nga sudlanan ug kaang, mahimo nang tanuman og lain-laing klase sa utanon sama sa pechay, talong, kamatis, ug sili.

Dugang pa niya, ang backyard gardening dili lamang makatabang sa pagminus sa gasto sa pagkaon kondili makapalambo usab sa kahimsog sa pamilya ug makahatag og dugang nga kita kung adunay sobrang ani.

Padayon usab ang CAGRO sa paghatag og teknikal nga tabang, binhi, ug mga seminar aron masuportahan ang mga residente nga gustong magsugod o mopalapad sa ilang mga tanaman sa panimalay.

RadyoMaN Kareen Beltran