PLT LADJA SA 901st MC/RMFB-9 MAPASALAMATON NI GOVERNOR JALOSJOS SA PAGPABALIK SA ILANG KURYENTE SA BORDER CHECKPOINT SA TOLON, RIZAL

44
Human sa halos duha ka bulan nga nag-antus nga walay kuryente sa ilang border checkpoint, nahibalik kini gumikan sa tabang ni Governor Rosalina β€œNanay Nene” Jalosjos.

Si PLT Harris Ladja, ang Platoon Leader sa 901st Maneuver Company/Regional Mobile Force Batallion sa rehiyon 9, ang mipaabot sa iyang dakong pagpasalamat ngadto ni Nanay Nene human gitubag gilayon ang ilang hangyo ngadto sa gobernador atul sa ilang pagkortesiya niini sa miaging bulan.

Saysay ni PLT Ladja nga nadestino siya sa maong lugar uban sa iyang 34 ka sakop sa maong platoon kaniadto pang bulan sa Abril 16, niining tuiga.

Niining higayona, daghan pa ang naka-duty sa maong border checkpoint ug hinay-hinay na usab kining nangawala human gibuksan pagbalik ang border.

Dugang ni PLT Ladja nga sa may tunga-tungang bahin sa Hunyo, naputlan sila sa kuryente sa ZANECO. Ug sa ilang pagpanginsusi, gikan pa sa bulan sa Pebrero niining tuiga, wala nabayaran ang ilang kuryente nga miabot na sa P15,612 ang bayrunon, diin unta ang kagamhanang probinsyal ilawum sa pamunuan sa miaging administrasyon ang magbayad niini.

Niini, si PLT Ladja nangita ug paagi paunsa masulbad ang maong problema, ug human lamang sa pipila ka adlaw sa ilang pagkortesiya ni Nanay Nene kaniadtong Hulyo 13, nahibalik ang ilang kuryente sa maong lugar.



Dugang ni PLT Ladja nga gawas sa pagpabalik sa maong kuryente, mihatag usab ang probinsya sa bugas ug gasolina.

Nasayran nga ang maong mga polis gipahimutang dinhi alang lamang unta sa National and Local Elections kanadtong Mayo 9, apan gipabilin sila hangtud karon sa maong lugar base sa mando sa ilang mga opisyal sa nasyonal. (PIC-mbmontederamos)

Facebook Comments