Malay, Aklan – Insigida nga naaresto it mga kapulisan rong ap-at ka mga suspetsado matapos nga ginkabuligang kastigihon ro sangka pulis kaina it aga-aga sa Galaxy Club nga nahamtang sa Brgy. Manocmanoc, Boracay.
Sa report it Malay PNP rong biktima sangka PO1 ag miyembro it Intel Operative kung Malay PNP.
Samtang rong mga suspetsado hay nakilaea nga sanday Angelo Tolentino Cahilig, 30-anyos, native it Poblacion Kalibo ag temporaryo nga naga tiner sa Sitio Bolabog, Balabag; Israel Tolentino Cahilig, 34-anyos, native it Poblacion Kalibo ag temporaryo nga naga tiner sa Brgy. Manocmanoc, Boracay; Deo Patriarca Romero, 35-anyos, native it Calabanga Camarines Sur ag temporaryo nga naga tiner sa Sitio Bantud, Manocmanoc ag si Eroll Dacanay Quijano, 24-anyos, native it Bora Tarlac ag temporaryo nga naga tiner sa Brgy. Balabag, Boracay.
Naga guwa sa imbestigasyon nga samtang ro biktima nga PO1 hay nagapatigayon it surveillance sa sueod it nasambit nga club ro suspek nga si Angelo hay liniab na rong pulis nga kung sa siin imaw ra hay tinikeod dayon it pulis ago mapaeayo kana.
Ginlibutan imaw it ap-at nga ka mga suspetsado ag dikara imaw nagpakilaea nga sangka pulis imaw bangud nga naga civilian eamang imaw. Dayon imaw ginhambaean ni Israel it “Ah pulis ka gali ha?” ag dayon binayo rong pulis sa dughan.
Danyon man nga nagbulig sa pagpauean it inumok sa pulis sanday Deo ag Errol lag ko ulihi napan-uhan raya it bouncer ko club ag sanda ra hay gin ampara.
Insigida man dayon nga nag-abot ro mga nag respondeng pulis ag nadakpan ro mag suspek kung sa siin sanda hay deatined makaron sa lock up cell it Malay PNP ag magapangatubang it kasong Direct Assault.
